27 Maart 2023 / Getrou aan die waarheid / 3 Johannes 3-4

Ek was baie bly toe hier medegelowiges kom en van jou trou aan die waarheid vertel, hoe jy in die waarheid lewe. Niks verskaf my groter vreugde nie as om te hoor dat my kinders in die waarheid lewe. - 3 Joh 3-4

Johannes was bly om te hoor dat sy vriend by die waarheid bly en Johannes het definitief 'n tipe vader-rol beleef in sy dissipelskap van Gaius.

As Johannes so voel, hoeveel te meer moet die Vader nie bly en opgewonde wees oor ons wanneer ons in die Waarheid wandel en getrou bly nie? Dieselfde glo ek beleef ouers wie se kinders die Here dien. Ek is seker dit moet hulle 'n groot mate van vreugde en blydskap verskaf. Ek glo ongelukkig, is die teendeel ook waar dat dit ours ook hartseer maak wanneer hul kinders nie die Here dien nie.

Oor 4 maande word ons eerste kleintjie gebore en ek sidder al klaar oor die geweldige verantwoordelikheid om nie net die kind groot te maak nie, maar ook groot te maak in die weë van die Here. Ek besef dat mens alles in jou mag kan doen om jou kind vir die Here groot te maak, maar op die ou einde van die dag lê daardie besluit by die kind.

Die meeste wat ons kan doen is net om ons kant te bring tot die beste van ons vermoë en te bid vir ons kinders. Meer as dit kan ons nie en ongeag die uitkoms, is dit ons verantwoordelikheid om ons kinders onvoorwaardelik lief te hê en genade te toon. Of hulle ons hartseer maak of nie...