8 Desember / Span jouself in met Jesus / Matteus 11:28-30

“Kom na My toe, almal wat uitgeput en oorlaai is, en Ek sal julle rus gee. Neem my juk op julle en leer van My, want Ek is sagmoedig en nederig van hart, en julle sal rus kry vir julle gemoed. My juk is sag en my las is lig.”

Wanneer werk moeilik is, is dit altyd makliker om iemand te hê wat saam met jou die las kan dra. Wanneer jy diere saam in 'n juk span, dan beweeg hulle saam in dieselfde rigting en hulle het meer krag. Die las van die werk word deur die aantal diere gedeel.

Partykeer is ons regtig moeg en afgemat. Ons word moeg in hierdie lewe weens die las van sonde, maar ons word ook fisies en emosioneel moeg wanneer ons moeilikhede en druk beleef.

Jesus gee vir ons 'n uitweg en nooi ons om saam met Hom in te span en Sy juk op te tel. Wanneer ons saam met Jesus ingespan word en ons leer by Hom, dan trek ons saam met Jesus in Sy Koninkryk. Ons kry krag en moed om aan te hou aanhou in hierdie lewe wanneer ons gemoed baie laag is.

Hierdie is 'n belofte wat die Here vir ons gee: Sy juk is sag en Hy sal ons help om ons laste te dra - solank ons saam met Jesus ingespan is en Sy Woord leer.