12 Februarie 2023 / Spoor mekaar aan elke dag / Hebreërs 3:12-13

Broers, julle moet toesien dat daar nooit by een van julle ’n verkeerde gesindheid van ongeloof ontstaan en hy van die lewende God afvallig word nie. Maar solank daar nog ’n “vandag” is, moet julle mekaar elke dag aanspoor sodat niemand van julle deur die misleiding van die sonde verhard word nie. Ons behou deel aan Christus as ons end-uit volhard in die vertroue waarmee ons begin het. - Heb. 3:12-13

Daar is heelwat waaraan 'n mens kan fokus in hierdie teks, maar ek wil fokus op die gedeelte van aansporing.

Deel van dissipelskap behels dat ons mekaar, mede-dissipels, moet aanspoor. Spesifiek moet ons mekaar aanspoor tot heiligheid, om te volhard in die geloof en nie in sonde vasgevang te word nie. Dit beteken dat ons daagliks moet uit kyk vir mekaar om mekaar aan te moedig om bo verdenking te lewe en wanneer ons iets sien wat dalk 'n gevaar kan wees, dat ons versigtig en in liefde ons mede-dissipel waarsku.