31 Desember / Baie Dankie 2022 / Kolossense 1:27-29

31 Desember / Baie Dankie 2022 / Kolossense 1:27-29
Photo by Kelly Sikkema / Unsplash
God het besluit om aan hulle bekend te maak hoe seënryk en heerlik hierdie geheimenis vir die nasies is. Die inhoud daarvan is: Christus is in julle, Hy is julle hoop op die heerlikheid. Hóm verkondig ons deurdat ons alle mense met alle moontlike wysheid onderrig en leer, sodat ons elke mens tot geestelike volwassenheid in Christus kan bring. Daarvoor span ek my ook in en beywer ek my met die krag wat Hy gee en wat kragtig in my werk. - Kol. 1:27-29

Ek wil graag begin deur dankie te sê aan ons Here Jesus Christus, vir die platform wat Hy my bied om jou te kan bedien met die Woord van God.

Daar is baie dinge in my lewe waarvoor ek dankbaar kan wees en daar is baie dinge waaroor ek gou opgewonde raak (tot my vrou se frustrasie met al my stokperdjies), maar daar is een ding wat my die mees opgewonde maak: dit is om Jesus te kan ken en om in diens van Jesus te kan staan.

Ek wil vir jou dankie sê dat jy hierdie nuwe Kortliks.co.za bediening van my ondersteun en dit moontlik maak om soos Paulus sê: mense met alle wysheid te kan onderrig en leer. Dit is my gebed dat Kortliks se tematiese Bybelverse en dagstukkies ons sal onderrig en leer sodat ons 'n beter begrip en verstaan sal hê oor die Woord en ook oor belangrike temas en onderwerpe wat tot ons lewens betrekking het.

Dankie vir elkeen se boodskappe wat ek gereeld ontvang, die gedagtes wat julle met my deel en die paar "pen pals" wat ek kon maak oor die laaste paar maande. Ek waardeer elkeen van julle en sien uit om 2023 saam met jou aan te pak.

Mag die Here jou ryklik seën!

Groete,
Riaan le Roux