31 Augustus / God het jou eerste lief / 1 Johannes 4:19

Ons het lief omdat God ons eerste liefgehad het. - 1 Joh. 4:19

Daar is mense wat sukkel om liefde vir ander te wys, omdat hulle regtig geen benul het hoe dit voel om ware liefde te ervaar nie. Dit is moeilik om vir iemand iets te gee wat jy nie self ontvang of ervaar het nie.

Ons is in staat om op God se standaard lief te hê omdat God ons eerste lief gehad het. Ons kan nie daaroor "leer" en daaroor lees en dit net probeer toepas nie. Om op God se standaard lief te kan wees, moet ons God se liefde eerstehands eers beleef en God se Gees moet binne in ons wees en in ons werk om dit na vore te bring.