27 November / Gered en geroep / 2 Timoteus 1:9

Hy het ons gered en ons geroep om aan Hom toegewy te wees. Dit het Hy gedoen, nie op grond van ons dade nie, maar op grond van sy eie besluit en die genade wat Hy van ewigheid af in Christus Jesus aan ons geskenk het. - 2 Tim. 1:9

God het ons gered. Kom ons begin eers daar. Redding is nie iets wat ek en jy vir onsself kan bewerkstellig nie. Dit is nie iets wat ons kan verdien nie. Dit is iets wat God inisieer en iets wat ons vrylik kan ontvang. Daar is wel 'n "catch-22" soos hulle sou sê.

As jy die genade van God wil ontvang en redding kry, dan word daar daarna van jou verwag om toegewyd aan God, d.w.s. heilig ,te lewe. Die geskenk kom voor die vereiste. Dit beteken dat ons sekerheid het van ons redding omdat ons dit eerste ontvang. Daarna lewe ons toegewyd aan Christus. Iemand wie nie toegewyd lewe nie, het moontlik nog nie die geskenk ontvang nie, want as jy weet wat jy ontvang het en dit werklik het, dan sal jy jou lewe neer lê voor ons allerheiligste God.