27 Januarie 2023 / God se goedheid / Romeine 2:4

God is ryk in goedheid, verdraagsaamheid en geduld! Sê dit vir jou niks nie? Besef jy nie dat God jou deur sy goedheid tot bekering wil lei nie? - Rom. 2:4

Die feit dat God nie vir ons onmiddellik straf en verdoem nie, maar eerder goed is vir ons, verdraagsaam en geduldig is teenoor ons; wys vir ons dat Hy ons wil red.

Die eerste instink van God is om te wil red en nie om te straf en verdoem nie. Tog beleef baie mense dit andersom omdat hulle God nie ken nie. Mense besef dalk wie God is a.g.v. wat ons van God leer in die natuur en in die Bybel, maar hulle besef nie altyd die rede waarom God goed, verdraagsaam en geduldig met ons is nie.

Dalk moet ons dit op onsself neem om ander te vertel van hoe goed, verdraagsaam en geduldig God is. Dit is tog God se eerste begeerte, om ons te red en om 'n verhouding met ons te hê.