28 Februarie 2023 / Onberispelike Kinders van God / Filippense 2:14-16a

Doen alles sonder kla of teëpraat. Sorg dat julle bo alle verdenking staan en opreg bly, onberispelike kinders van God te midde van ontaarde en korrupte mense. Tree onder hulle op as ligdraers in die wêreld deur die woord van die lewe uit te dra. Dan sal ek op die dag van Christus se koms rede hê om trots te wees, omdat dit sal blyk dat ek my nie verniet ingespan het nie en nie verniet geswoeg het nie. - Fil. 2:14-16a

God verwag van ons om ligdraers te wees in hierdie wêreld deur die Woord van God uit te dra, maar ons moet dit doen sonder om te kla of teë te praat en op so 'nmanier dat ons lewens bo verdenking is. Dit is belangrik dat ons lewens bo verdenking is, anders doen ons skade aan die boodskap van God.

Het jy al na 'n ander man en vrou se kinders gekyk wat verskriklik stout is en vreeslik ongedissiplineërd is... sonder dat jy dit besef of bedoel, skep dit by jou 'n indruk oor die ouers. Alhoewel dit nie altyd die geval is nie, is dit baie keer 'n refleksie op die ouers.

As Kinders van God, hoe ons onsself gedra skep 'n indruk op die mense om ons en dit beinvloed hul indrukke of persepsie van die Here. Kom ons maak seker dat ons 'n goeie indruk los!