24 Januarie 2023 / Ons het werk om te doen! / 2 Petrus 3:9
Die Here stel nie die vervulling van sy belofte uit nie, al dink party mense so. Nee, Hy is geduldig met julle, omdat Hy nie wil hê dat iemand verlore gaan nie: Hy wil hê dat almal hulle moet bekeer. - 2 Pet. 3:9
Partykeer wonder ons hoekom het Jesus nog nie terug gekom nie. Daar is baie redenasies en debatering oor wanneer party mense dink Jesus gaan terug kom... maar die werklikheid is dat Jesus self nie weet wanneer Hy terug kom nie.
Al wat ons weet is dat Jesus is nog nie terug nie en die vers leer vir ons dat Jesus steeds Sy belofte gaan hou. Wat ons nog leer is dat Jesus geduldig is, want Hy wil soveel moontlik mense red. Daarom, hoe langer dit vat voordat die Wederkoms plaasvind, hoe meer tyd en geleentheid is daar vir mense om te bekeer.
Die vraag wat ons moet vra is nie wanneer kom Jesus terug nie, maar hoeveel mense kan ek met die Evangelie bereik voordat Jesus weer terug kom.
Ek wil my amper verstout en sê, as ons wil hê Jesus moet gou terug kom, dan moet ons hard aan die werk spring sodat soveel moontlik mense tot bekering kan kom!