24 Desember / Vriende is soos yster / Spreuke 27:17

Yster slyp yster, vriende vorm mekaar. - Spr. 27:17

Hierdie is 'n baie bekende vers vanuit Spreuke wie meestal van ons al iewers gehoor het, indien ons dit nog nie self raak gelees het nie.

Ek het so 'n paar maande terug 'n nuwe stokperdjie begin en het begin om messe te maak. Een van die dinge wat my die meeste frustreer wanneer ek 'n mes mooi gevorm en afgeskuur het, sodat die lem 'n mooi oppervlakte het, is wanneer 'n ander stuk staal aan die oppervlakte raak en dit krap. Wanneer twee staal voorwerpe aan mekaar raak, kan jy dit nie verhoed nie - die een gaan die ander een krap.

Een stuk staal, het altyd 'n impak op die ander stuk staal en gewoonlik is dit die harder staal, wat op die sagter staal die impak het.

Vriende is soos yster. Vriende vorm jou - hulle vorm jou deur jul gesprekke, idees, kritiek, aksies en tyd wat julle saam spandeer, maar net soos yster is daar altyd 'n vriend besig om die ander te beïnvloed. Die vraag is net: wie beïnvloed wie?

As jy die sagter vriend is, wat deur ander gevorm word, dan moet jy seker maak dat jy jouself met die regte vriende om ring. As jy die sterker vriend is, dan moet jy seker maak dat jy Goddelike impak op jou vriende om jou het.

Watter tipe vriend is jy?