20 Januarie 2023 / Geduld met 'n interessante eienskap / 1 Tessalonisense 5:14-15

Ons druk julle dit op die hart, broers: Wys die leeglêers onder julle tereg, praat die kleinmoediges moed in, help die swakkes, wees met almal geduldig. Sorg dat niemand ’n ander mens kwaad vir kwaad vergeld nie. Beywer julle liewer altyd vir die belange van julle medegelowiges en van alle mense. - 1 Tess. 5:14-15

Daar is baie omstandighede waarin ons geduld moet beoefen. In die gemeente van Christus, die Liggaam, moet ons geduldig wees met mekaar met die doel om mekaar te help.

Wanneer ons mede gelowiges swaar kry, of swak in die geloof is, of wanneer hul gemoed laag is - dan moet ons geduldig wees met sulke mense omdat ons hul belange eerste op die hart moet dra.

Wanneer ek en jy in 'n area sterk staan, kan ons moontlik in die strik trap om ongeduldig op te tree teenoor ander mense wat aanhoudend sukkel in 'n area waarin ons sterk is. Ons raak partykeer ongeduldig, nie omdat ons dink ons is beter nie, maar omdat ons dalk nie kan begryp hoe die persoon kan sukkel waarmee hulle sukkel nie.

Dit is iets waarmee ek partykeer sukkel en ek het al baie vêr gekom, met die Here se genade, die laaste klompie jare - maar ek is nog vêr van waar ek moet wees.

Gebed

Dankie Vader dat U met ons geduldig is. Help ons asseblief om geduldig op te tree teenoor ander mense wie dalk sukkel, of swak is in seker areas wat ons nie verstaan nie. Help ons om hulle te ondersteun en by te staan en om geduldig met hulle te wees. Amen.