18 Maart 2023 / Onderwerp jou aan die Landswette / 1 Petrus 2:13-15

"Omdat die Here dit wil, moet julle julle onderwerp aan elke menslike owerheid, of dit nou die keiser as hoogste gesag is of die goewerneurs as sy gevolmagtigdes wat dié wat kwaad doen, moet straf, maar dié wat goed doen, moet prys. Dit is die wil van God dat julle deur goed te doen, ’n einde sal maak aan die kwaad wat mense sonder begrip uit onkunde praat." - 1 Pet 2:13-15

Regerings en mensgemaakte owerhede is 'n instelling deur God. Dit beteken nie dat almal wat in die instelling is, Christene is nie, maar dit beteken dat die regering en landswette is as instelling, in diens van God, om die wat verkeerd doen te straf. Ongelukkig word dit nie altyd so goed toegepas soos wat ons sou wou hê dit moet wees nie, maar die opdrag hier is om gehoorsaam te wees aan die regerings en landswette.

Omdat ek 'n Christen is, beteken nie dat ek my nie hoef te onderwerp aan die wette van die land nie, maar eerder dat ek so moet lewe en die wette gehoorsaam, dat iemand nie na my as Christen kan vinger wys en sê ek doen verkeerd nie. Waar landswette in teenstryd met die Woord van God is, sal ons natuurlik die Woord van God eerder gehoorsaam.