10 Maart 2023 / U wil alleenlik / Matteus 6:10b

"... laat u wil ook op die aarde geskied, net soos in die hemel." - Matt 6:10b

Wanneer ons bid, moet ons bid dat God se wil sal geskied op aarde net soos in die Hemel. Die vraag kan wees, hoe geskied God se wil in die Hemel? Ek sou dink dat Sy wil perfek in die Hemel geskied, dat dit mooi en reg en heilig is, maar dat dit ook ten volle plaasvind soos God dit wil.

Die aarde is stukkend en die mense gebroke, sonde spoel oor die aarde heen - maar ons moet bid dat God se wil ook volmaak en perfek sal wees op aarde. Dit mag dalk eers heeltemal gebeur wanneer Jesus terug kom, maar verbeel jou hoe sou die wêreld gelyk het as God se wil hier geskied soos in die Hemel?

Kom ons bid dat God se wil sal geskied, maar dat ons ook gewillig en beskikbaar sal wees om God se wil uit te voer waar en wanneer ons kan. Kom ons bid en vra dat God vir ons op 'n daaglikse wyse sal lei in die Gees sodat ons nie net in Sy wil wandel nie, maar dat ons ook dit sal uitvoer soos die Gees ons lei om te doen wat reg is.